Рассылка обновлений по Email

вторник, 29 марта 2011 г.

Молитва за благодетелей (жвущих ныне и усопших)

Молитва за благодетелей
(УСОПШИХ),
особенно руководивших к добродетели
http://www.molitvoslov.com/text197.htm

Господи Иисусе Христе Боже наш! Ты заповедал еси нам воздавати всем должное, егда рекл еси: "Якоже хощете да творят вам человецы, и вы творите им такожде". Что убо сотворю, Господи, что воздам ныне, во мнозе благотворившему(-шей) мне, но уже отшедшему (-шей) от земли живых рабу Твоему (рабе Твоей)! У Тебе, Господи, у Тебе, богатый в милостех Боже наш, всякое воздаяние есть. Сего ради молю Тя, Подателю благих, приими от мене сие малое моление мое, вкупе же и благодарение за все благодеяния Твои, дарованныя мне в приснопоминаемом(-мой) усопшем(-шей) рабе Твоем (Твоей). Молю Тя, Боже, Спасителю мой призри с высоты Святаго жилища Твоего на молитву мою и помяни милостию Твоею отшедшаго(-ую) к Тебе раба Твоего (рабу Твою) (имя), толико благодеявшаго(-ую) ми; яви ему (ей) силу благости Твоей и неизреченное Твое милосердие в прощении и оставлении грехов и покрый его (ю) оправданием Твоим; подаждь ему, Господи, Царство Небесное и вечный покой, яко помогавшему(-шей) ми и ближним моим в нуждех и лишениях, в скорбех и болезнех и подававшему (-шей) ми благая от избытков даров Твоих. Молюся убо Тебе, Благость вечная, воздай ему (ей) за благотворения его (ея) сторицею - за земныя блага небесными, за временныя вечными, и подаждь ему (ей) вечный покой; и яко научавшему(-шей) мя делам милосердия, кротости, смиренномудрию, терпению, воздержанию, вселявшему (-шей) в мя дух мира и любви христианской, подававшему (-шей) ми благие советы и благие образы христианскаго жития, даруй, Премилосердый Господи, достойно узрети невечерний свет Твоего Царствия и насыти его (ю) от небесныя трапезы Твоея, яко во имя Твое препитавшаго(-ую) жаждущую и алчущую мою душу. Помяни, Господи, и всех отшедших к Тебе, в вере и добродетельном житии подвизавшихся во славу Пресвятаго Имени Твоего, добро творивших сирым, нищим и убогим; упокой в лоне Авраама, Исаака, Иакова, посещавших недугующих, страждущих и в темнице заключенных; приими в чертог Твой принимавших в дому своем странна и пришельца. Помяни, Господи, во Царствии Твоем усопших рабов Твоих, выну предстоявших и молившихся Тебе теплою молитвою о нашем душевном спасении и благоденствии, о сохранении и благостоянии святых Твоих церквей, о мире и спасении всего мира; упокой со святыми Твоими рабов Твоих, молившихся о обращении к Тебе заблудших и отпадших от веры и о спасении погибающих во грехах. Молю Тя, Христе Боже наш, молю Тя, яко Судию, имущаго судити мирови, воздай им по человеколюбию Твоему, и сподоби их услышати вожделенный оный глас: "Приидите, благословеннии Отца Моего, и наследуйте уготованное вам Царствие от сложения мира", и да внидут в онь, хваля и прославляя Твое великолепое имя в безконечные веки. Аминь.
------------------------------------------------------------------------
Молитва за благодетелей
(ЖИВУЩИХ НЫНЕ),

Митрополит Трифон (Туркестанов)
ПРОПОВЕДИ И МОЛИТВЫ
http://krotov.info/libr_min/19_t/tur/kestanov_04.htm

5 июня 1934 г.

Господи Боже, Спасителю наш! Призри с небесе святаго Твоего и приими смиренное благодарение наше за великие щедроты Твоя, на нас, недостойных бывшая, и услыши моление наше о рабах Твоих {имярек), яже избрал еси быти благотворящим нам и ими же явил еси на нас неизреченныя Твоя милости. Благодарим Тя, Господи Боже наш, яко не оставил еси нас, сирых, в скорбех и напастех, но послал еси нам слуги Твоя, благотворители наша (имярек), да исполнят над нами благое Твое произволение.

Хвалим, благодарим, славословим Тя, Господи, тепле припадаем к Тебе, поклоняемся Тебе и молимся. Благословением Твоим, Господи, благослови рабу Твоя {имярек), сотворимыя нам благая, и сторицею, Человеколюбие, воздаждь им богатою Твоею милостию. Покрый я, Господи, спасительною десницею Твоею во вся дни живота их и буди им Помощником и Покровитель во всех делах их. Ангелом Твоим, Господи, заповиждь о них сохра-нити их во всех путях их и милосерд к ним, Милос-тиве, буди милосердия их ради.

Веселия и радости исполни, Господи, сердца их; мир Твой, здравие и спасение подаждь им; спаси и помилуй рабы Твоя {имярек), благотворящия нам, благодатию Твоею во веки веков. Аминь.
-------------------------------------------------------------------------

"ПРЕДСМЕРТНАЯ" МОЛИТВА
МИТРОПОЛИТА ТРИФОНА

Господи, Иисусе Христе, Боже наш, молитвами Пречистыя Твоея Матери, святых Ангелов хранителей наших и всех святых, приими мою усердную молитву за всех моих чад духовных, живых и мертвых.

Приими молитву за всех благотворящих мне, милующих и даруй всем милость Твою великую: живых соблюди в мире и благосостоянии, усопшим даруй вечный покой и бесконечные радости.

Господи, Боже мой, видишь Ты искренность молитвы моей, яко ничим же могу возблагодарить их, токмо сей усердной моей молитвой.

Приими же сия словеса моя, яко дело благотворения и помилуй всех нас.

5 июня 1934 г. Написано под диктовку митрополита Трифона М. А. Гусиной.

Комментариев нет: