КАНОН СВЯТОМУ ПРЕПОДОБНОМУ СЕРАФИМУ ВЫРИЦКОМУ

КАНОН СВЯТОМУ ПРЕПОДОБНОМУ

СЕРАФИМУ ВЫРИЦКОМУ

Тропарь, глас 4-й

Яко великаго молитвенника за землю нашу и утешителя теплаго притекающих к тебе, ублажаем тя, вторый русский отче Серафиме, вся бо яже в мире красная оставил еси, всем сердцем устремился еси к чертогам Сладчайшаго Христа и в годину лютых гонений образ кротости и смирения всем был еси: не престай и ныне молитися за ны, да в терпении обрящем путь покаяния и с тобою выну славим Пресвятую Троицу.

Канон, глас 2-й

Песнь 1

Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть, препрославленный Господь славно бо прославися.

Припев: Преподобне отче наш Серафиме, моли Бога о нас.

Како возможем достойно воспети твое богоугодное житие, преподобне; от юности бо Христовою любовию уязвився, огнь сей Божественный в сердце твоем невредимо соблюл и приумножил еси, темже и нам подаждь просвещение по долгу тя славити.

Преподобне отче наш Серафиме, моли Бога о нас.

Ангельстии Чини радовахуся, зряще твое усердие и желание послужити Богу во иночестем чине, но воля Божия бысть исперва тебе в мире благочестно пожити, созидая святыя обители и храмы, имея попечение о нищих и сирых, душу же свою уготовляя Господу в сосуд избранный.

Слава: Корыстолюбие и сребролюбие отринул еси, отче преподобне, гордаго змия смирением твоим поправ, плотская взыграния умертвил еси и житейския сласти терпением посекл еси, в радости послужил еси всем требующим твоея помощи.

И ныне: О, Пречистая Дево Богородице, не презри нас грешных, требующих Твоея помощи и заступления, буди Ходатаица о народе нашем, да покаянием обрящем отпущение грехов и живот вечный.

Песнь 3

Ирмос: Процвела есть пустыня, яко крин, Господи, языческая неплодящая церковь Пришествием Твоим, в нейже утвердися мое сердце.

Преподобне отче наш Серафиме, моли Бога о нас.

В мирстем житии твоем старцу Варнаве за духовным наставлением притекал еси, усердно послушание ему во всем являя, темже и сподобился еси от него благословения и даров духовных.

Преподобне отче наш Серафиме, моли Бога о нас.

О убогих присно попечение имея, преподобне, не возгнушался еси послужити оным своима рукама, показуя, яко всяк человек сердцу твоему возлюблен есть.

Слава: Словеса аввы твоего Варнавы добре сохраняя, очистив ум, тело и душу, преподобне, дом был еси Трисолнечнаго Света, украшен добродетельми.

И ныне: Преблагословенная, Всенепорочная Богородице Марие, Слово Божие нам рождшая, свобождшаго избранныя Своя от тленного мира, ихже молитвами и нас спаси.

Господи, помилуй  (трижды).

Седален, глас 3-й

Умиленным сердцем прославляем тя, добрый наш пастырю и кроткий наставниче Серафиме, буди нам скорый помощник во всех бедах и напастех и помози заповеди Господни добре сохраняти во спасение душ наших.

Слава и ныне: Яко невозделанная, Дево, Лозо, краснейший Грозд прозябла еси, источающ нам вино спасения, всех веселящее души и телеса, темже, яко Вину Тя добрых, блажаще присно со Ангелы вопием Ти: Радуйся, Благодатная.

Песнь 4

Ирмос: Пришел еси от Девы, не ходатай, ни Ангел, но Сам Господи воплощся, и спасл еси всего мя, человека. Тем зову Ти: слава силе Твоей, Господи.

Преподобне отче наш Серафиме, моли Бога о нас.

Око сердца управив ко Творцу всяческих, Серафиме, согласно с супружницею иноческий образ восприяв, претерпел еси козни гонителей, на Бога Единаго упование возлагая.

Преподобне отче наш Серафиме, моли Бога о нас.

Евангелия Христова истинный послушник явился еси, преподобне, и скоро восшел еси лествицею добродетелей к совершенству, всякое послушание добре исполняя и молитву в сердце непрестанно совершая.

Слава: Монашеским добродетелем в мире навыкнув и изрядный опыт житейский имея, добрый наставник миряном и иноком показался еси, отче, сотаинник священномученика Вениамина Петроградскаго быв, от него же и посвящение иерейское приял еси.

И ныне: Тебе, Дево, Едину вси вернии стяжахом Заступницу тверду, Ты бо Бога родила еси нам, сего ради хвалами, Чистая, Тя ублажаем, роди земнии, по глаголу Твоему.

Песнь 5

Ирмос: Ходатай Богу и человеком был еси, Христе Боже: Тобою бо, Владыко, к Светоначальнику, Отцу Твоему, от нощи неведения приведение имамы.

Преподобне отче наш Серафиме, моли Бога о нас.

Язык человечь не возможет по долгу восхвалити труды и подвиги твоя, яже в келлии втайне совершал еси, отче преподобне, но не может укрытися светильник верху горы  стоя, сего ради притекаху к тебе лаврская братия и мирстии людие, совета ради и наставления духовнаго.

Преподобне отче наш Серафиме, моли Бога о нас.

Посреде бури гонений и нестроений тверд и незыблем явился еси, преподобне, очи сердца твоего выну ко Господу имея и от Него просвещение приемля творити волю святую Его.

Слава: Образ великия ангельския схимы приял еси, отче, и наречен был еси в память преподобнаго Серафима, угодника Саровскаго, егоже от юности всем сердцем возлюбив, потщался еси житию онаго подражати в Дусе и истине.

И ныне: Дивно превознесеся слава Твоя, Богородице Дево, се бо во чреве Христа Бога паче слова имела еси, якоже Исаия провозгласи, и выше естества Сего, Богородительнице, родила еси.

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Преподобне отче наш Серафиме, моли Бога о нас.

Озаряем свыше светом Христовым, Богомудре, и по преселении твоем к Богу неоскудно исцеления источаеши всем с верою притекающим к тебе.

Преподобне отче наш Серафиме, моли Бога о нас.

Любовь божественная, яже в души твоей, отче преподобне, попаляет духи нечистая, темже и одержимых оными свобождает и к жизни во Христе возрождает.

Слава: Гласом тихим и кротким наставлял еси притекающия к тебе любви, смирению и молитве непрестанной, попаляющей всякий грех.

И ныне: Ужасошася Ангелов воинства и человеков роди, Всенепорочная, страшнаго и паче ума Рождества Твоего, како и Дева пребыла еси, и Мати Божия быти сподобилася еси, сего ради достойно Тя вси славим.

Господи, помилуй (трижды). Слава, и ныне

Кондак, глас 5-й

Подражая богоносному угоднику Саровскому, Духа Святаго благодать обильно стяжал еси: Александро-Невския Лавры крине благоуханный, Вырицкия веси похвало, сего ради и мы тебе зовем: радуйся, преподобне Серафиме, милостивый наш предстателю пред Господем.

Икос

Ангелов Творец и Господь Сил Небесных предызбра тя от юности твоея, преподобне, быти Ему служителем верным и наставником на путь спасения притекающим к тебе, темже и мы, дивящеся величию чудес твоих, с любовию вопием ти: Радуйся, яко измлада Богу послужити возжелел еси; радуйся, яко в мире пребывая, добродетельным житием Богу угождал еси; радуйся, яко был еси утешитель страждущих; радуйся, яко стяжал еси пламенную любовь ко Христу; радуйся, преподобнаго Варнавы учениче прилежный; радуйся, дивнаго Серафима подражателю усердный; радуйся, Алексадро-Невския Лавры чудное прозябение; радуйся, веси Вырицкия Божие благословение; радуйся, скорый помощниче в скорбех и болезнех; радуйся, светильниче веры Православныя и благочестия; радуйся, преподобне Серафиме, милостивый наш предстателю пред Господем.

Песнь 7

Ирмос: Богопротивное веление беззаконнующаго мучителя высок пламень вознесло есть. Христос же простре богочестивым отроком росу духовную, Сый благословен и препрославлен.

Преподобне отче наш Серафиме, моли Бога о нас.

Серафиму и Варнаве преподобным подражая, святыми их молитвами укрепляем был еси, святе, темже от Бога сподобился еси пророческаго дара: грядущая народу нашему и Церкве Российстей предвозвещати.

Преподобне отче наш Серафиме, моли Бога о нас.

Еленю подобно, стремяшеся душа твоя, преподобне, к Горним обителем, Промыслом Божиим соблюдаема от пленения безбожных, поющи: благословен еси, Боже отец наших.

Слава: Руце твои, отче Серафиме, ко Господу непрестанно воздевая, моление на камени совершал еси, подобно угоднику Божию Саровскому, поя: благословен еси, Боже отец наших.

И ныне: Ангельския Силы воспевают Тя немолчно, Богородительнице, и мы, грешнии, взывати дерзаем: наше житие, Пречистая, к Твоему всетихому пристанищу направи, Сыну Твоему зовущих: благословен еси, Боже отец наших.

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.

Преподобне отче наш Серафиме, моли Бога о нас.

Фарисейскую гордыню отвергше, усердно приступим ко гробу твоему, Серафиме, источает бо оный неоскудную струю исцелений и пети нас воздвизает: благословите, вся дела Господня, Господа (дважды).

Слава: Молитвою твоею, преподобне, чудеса дивная сотворил еси: слепорожденная бо прозре, немая проглагола, одержимии же от духов злобы свобождашася, темже вси пояху: благословите, вся дела Господня, Господа.

И ныне: Естество всякое обожил есть из Тебе воплощся Господь, Владычице, земных существо, поющих: благословите, вся дела Господня, Господа.

Песнь 9

Ирмос: Безначальна Родителя Сын, Бог и Господь, воплощся от Девы нам явися, омраченныя просветити, собрати расточенныя. Тем Всепетую Богородицу величаем.

Преподобне отче наш Серафиме, моли Бога о нас.

Чисте зрети сподобился еси Царицу Небесную, преподобне, предвозвестившую Ти скорое отшествие твое от мира сего, темже духом возрадовався, Бога прославил еси.

Преподобне отче наш Серафиме, моли Бога о нас.

Утверди сердца наша, отче преподобне, да в радости душевней предстоя Богу, испросим одоление на враги видимыя и невидимыя, и спасение душам нашим.

Преподобне отче наш Серафиме, моли Бога о нас.

Душею твоею, яко огненный Серафим, пламенея, научаеши нас, отче, истинней любви ко Господу, помози же нам святою твоею молитвою земный подвиг совершати, призывая Сладчайшее Имя Господа Иисуса.

Слава: Недостойными усты песнь тебе принесохом, преподобне, и ныне сподоби нас твоего отеческаго благословения, да делы благими прославляем Бога нашего, дивнаго во святых Своих.

И ныне: Емуже предстоят со страхом Серафими и Херувими, Мати по плоти неложно сподобилася еси быти, Всенепорочная, яко родила еси нам Бога Спасителя, Единаго от Троицы, Сына и Слова, Крестом разоршаго смерть, Егоже о нас с ликом преподобных моли спастися душам нашим.